ـــ معلومات عامه ـــ
- اسم اللعبة: hitman 3
- نوع اللعبة: اكسن من منظور الشخص الثالث
- استديو التطوير: IO interactive
- الناشر: IO interactive
- تاريخ الإصدار: 20/1/2021
- الأجهزة: Nintendo Switch, PlayStation 4, Xbox One, PlayStation 5, Microsoft Windows, Linux, Macintosh operating systems
- جهاز المراجعة: PC
ـــ مقدمه ـــ
العميل ٤٧ يعتبر من الشخصيات المعروفه في عالم الالعاب. وكذلك يعتبر الشخصيه المهمه خلف نجاحات كثيره قدمها استديو Io interactive الاستديو الي ابتداء كمستقل وقدم السلسله بشكل جيد حتى لاقت استحسان الجمهور وكذلك شركة ايديوس رالي ب التالي اصبحت فرع من شركة سكوير اينكس العملاقه
ـــ القصه ـــ
القصه هي ختامية احداث الجزئين السابقين .. على شان چذي اول شي اقولك اياه عن القصه لازم تكون عرفها حتى لو شايف ملخص .. لان الشخصيات ما راح يعطيك عنهم تاريخ او تفاصيل ممكن ادخلك في اجواء القصه. ام بخصوص قصة الجزء فهي جميله وشدتني والسبب ان ابي اعرف نهاية العميل ٤٧ مع العدو والمنظمه البروفدنس .. القصه فيها تويستات بسيطه .. وكذلك حبكه جميله .. الشخصيات الي تغتالها ب العبه لهم اسباب واضحه وتزيد من دورهم ب القصه على الرغم من وجودهم الي يعتبر شبه معدوم.
ـــ نظام العب ـــ
من ناحية طريقة العب ما لحظت اختلاف كبير عن الجزء السابق .. هذا ما يعني ان شي سيئ ابدا لان الجزء السابق قدم طريقة لعب جدا ممتازه.. لما تبدي المهمه يعطونك الاهداف الي لازم تسويها .. المرحله عباره عن لغز وانت لك الحريه الكامله في حله.. تقدم مع المهمه خيارات قصص ممكن تمشي فيها واهيا “Mission story” وكل قصه تعطيك فرصه بأن انت تتعمق ب قصة المهمه نفسها وكذلك فرصه انك تذبح الهدف .. هذا الشي كان موجود ب الجزء السابق وكذلك جمهور السلسله حب هذا الشي ف ليش ما يرجع.. التطويرات ب العبه تحتاج منك تخلص المهمه وتجمع نقاط الخبره وبعدها راح تفتحلك اسلحه جديده تستخدمها ب المهمه نفسها ما تقدر تاخذها معاك في مهمه ثانيه .. خيارات حل المهمه مثل ما ذكرت مفتوحه من الممكن انك تخلصها عن طريق التخفي وتغير لبس الشخصيه بالطريقه الي تخدمك مثلا تتنكر كأحد الحراس او الطباخ او عامل الصيانه.. وهذا كله على شان يخدم مصلحتك في انهاء المهمه .. او تقدر تخلصها ب انك تذبح ب العلن ولكن راح تواجهه صعوبه بهذا الشي حتى لو لعبتها ب النورمل .. من الاشياء الجميله هو تنوع المراحل او المناطق الي تزورها .. بعض المناطق تحتاج وقت منك على شان تخلصها وطول معاك .. والبعض راح تخلصها بشكل سريع .. احد المهمات الي حاب اذكرها واشوفها جدا ممتازه ويمكن الافضل ب الثلاثيه كامله هي المرحله الثانيه في القصر مهمه جدا ممتازه وكذلك القصص الي فيها تشدك .. بدال ما انت تكون القاتل راح تتيح الفرصه بأنك انت المحقق هذا الشي الي بذكره فقط لان ما ابي احرقها اذا حاب تشتري العبه. من سلبيات نظام العب هو الذكاء الصناعي .. ما اقول ان سيئ ولكن في بعض المشاكل الي انت بنفس تسويها تخلي العدو يكون غبي على سبيل المثال كل شخصيه تبي تغتلها يكون معاها حارس شخصي اذا حاولت توقفه راح يبدي يتاخر عن الشخصيه الي قاعد يحرسها ويكمل يمشي على نفس النمط .. ف يصير بعيد عن الشخصيه المطلوب منه يحميها .. ممكن البعض ما يشوفها عيب ولكن المطور كان يقدر يعطي ميزه حق الحراس الشخصين للهدف ب ان اذا قربت منهم وحاولت توقف ب طريجهم يطقون العميل او يدخلون ب قتال معاه اشوفها راح تكون اكثر منطقيه وتخليك بعيد عنهم..
ـــ التصوير ـــ
الرسومات ب العبه اشوفها جيده جدا خصوصا في وقت العب.. تنوع بيئات الخريطه مثل دبي / برلين / الصين / او حتى الارجنتين.. مشكلة التصوير ب العبه هو المشاهد السينمائيه كأنها من جيل البلي ستيشن ٣ .. على الرغم من وقت العب جدا ممتاز .. العبه شغاله على كرت ٣٠٩٠ مع كامل الاعدادات الالترا المتاحه فوق ٩٠ فريم .. تصميم اشكال الشخصيات بعضها متكرر خصوصا الجانبيه منها.
ـــ الأصوات ـــ
راح اتكلم عن اصوات الموسيقى التصويره / البيئه / وكذلك اداء الشخصيات.. الموسيقى التصويره ب العبه جدا ممتازه .. اوقات الحماس والاكشن راح تسمع الموسيقى ترتفع معاك وتكون حماسيه .. اما في اوقات التخطيط والتخفي راح تكون موسيقى الغموض واضحه … اصوات البيئه مثل الشجر الطيور او الشخصيات المتواجده ب المهمه جدا ممتازه .. التزام الشركه بشخصية العميل ٤٧ من ناحية الروح الفكاهية المعروف فيها رجع في هذا الجزء .. بعكس الجديه ب الاجزاء السابقه وهذا الشي فعلا يخليك تستذكر العميل في جزء بلود موني ..
ـــ عمر العبه ـــ
العبه تتطلب منك تقريبا ٧-٨ ساعات على شان تخلصها اذا انت كنت شخص مو حاب انك تعيد المهمات وتكتشف القصص الي فيها وتخلص كل شي .. لكن المطويرن اعتقد انهم تعمدوا تقليل عدد المراحل وصقلهم اكثر. بالاشياء الي تسويها ب المهمه الوحده من ناحية استكشاف القصص .. الاماكن المخفيه .. فتح الاسلحه او حتى اماكن بدايتك للمرحله..
ـــ السلبيات والعيوب ـــ
- عدم وجود تطويرات كثيره ب العبه وكأن العبه اضافه
- رسوم المقاطع السينمائيه ضعيفه
- بعض المشاكل ب الذكاء الصناعي
- واجهة مستخذم مطابقه تماما للجزء السابق من غير تحديث اطلاقا
التقيم النهائي
القصه - 7
نظام العبه - 8.5
التصوير - 8
الأصوات - 7.5
عمر العبه - 9
8
هتمان ٣ قدمت لي ٩ ساعات لعب ممتعه.. نظام تسلل ممتاز ختام لقصة الثلاثيه بشكل مرضي وجميل .. لعبه لها عمر طويل ب اعداة انهاء المراحل والمهمات بطرق مختلفه وتتيح لك الحريه المطلقه في انهاء المهمات .. اذا عجبتك الاجزاء السابقه انا متاكد انها راح يعجبك الجزء وانصح بشراء العبه بسعرها الكامل.
قواك الله