- اسم اللعبة: Outriders
- نوع اللعبة: شوتر لوتر منظور الشخص الثالث
- استيديو التطوير: People Can Fly
- الناشر: Squire Enix
- تاريخ الإصدار: 1/4/2021
- الأجهزة: PC/Playstation/Xbox
- جهاز المراجعة: PC
- هل العبه تتطلب الانجليزي او مترجمه: العبه تتطلب الانجليزي وليست مترجمه
- التصنيف العمري: 16 وما فوق
معلومات عامه
لعبة اوت رايدرز من تطوير استديو People Can Fly ونشر شركة Squire Enix. العبه تعتبر من الشوتر لوتر ثيرد بيرسن. توفرت العبه تاريخ ١/٤/٢٠٢١ على جهاز الكمبيوتر / بلي ستيشن / والاكسبوكس وبخصوص الاكسبوكس فهي متوفره على خدمة القيم باس. اعتمدت في هذي المراجعه على تقيم القصه / القيم بلي / التصوير / الاصوات / والاونلاين والمشاكل التقينه.
القصه
تبدأ قصة العبه ب ان الارض انتهت والحروب والكواثر الطبيعيه قضت عليها. وانت تكون احد الاشخاص الي يتجهون للفضاء لاكتشاف كوكب جديد من الممكن ان يكون المكان الي تعيش عليه البشريه ب امن وسلام. انت احد الاشخاص الي يطلقون عليهم Outriders. بعد الوصول الي الكوكب الموعودEnoch يتعرض الفريق الى عاصفه غريبه هذي العاصفه قتلت نص الفريق. بعد ٣٠ سنه تقريبا وبعد وضع بطل العبه في الممات الثلجي او CryptoStasis يقوم ويلقى ان هذا الكوكب الي كان الامل الوحيد للبشريه صار هو هلاك البشريه صارت الحروب بكل مكان بين كتيبات مختلفه تعرف عنهم اكثر ب القصه. بوجهة نظري اشوف ان القصه عاديه جدا وبالعكس بعض الاحيان تحس ب الملل ودك تخلص العبه. ولكن عالم العبه والاشياء الي من الممكن يبنون عليها لعبه اخرى عجبني لوور العبه ممتاز من ناحية الكتايب الي موجوده وغيرها. لكن لا تتوقع ان العبه تحمل داخلها قصه راح تذكرها بعد ما تخلصها.
نظام العب
الشوتر لوتر
من المعروف ان هذا النظام يعتمد على الايتم الي طيح لك مثل الاسلحه الدروع والقراندك او التفريم الشي المختلف والي عجبني في لعبة اوت رايتر ان النظام هذا موجود ولكن بمستوى ثاني على سبيل المثال اذا كنت لابس درع يعطيك ميزه بأن السلاح مالك يزيد الدمج فيه اذا كان يطلق طلاقات سامه وخليت سلاحك يطلق طلاقات سامه راح يزيد الافكت ماله. او اذا خليت ان سلاحك يبطئ العدو ولبسك يزيد الضربات على العدو البطيئ هذي الامور كلها راح تفتح مجال اكثر بأن انت تنوع بين اللبس والاسلحه وراح يضيف درجه من التحكم ب الاشياء الي انت تسويها.
نظام رفع مستوى الشخصيه
نظام رفع مستوى الشخصيه جدا بسيط تبدأ العبه بالاختيار بين اربع كلاسات مهمه وكل واحد له دور ب العبه يعني عندك التانك الي يتحمل الضربات بشكل اكبر من الباجي او التركستر الي يعتمد على السرعه والتوغل بين الاعداء او غيرهم. صراحه التنويع بين الشخصيات عجبني. ورفع مستواهم بطريقه الاعتياديه انهاء المهمات قتل الاعداء يزيد لك نقاط خبره ولكن اذا مت وانت بنص القتال النقاط الي جمعتها تروح عليك. هذا الشي يزيد التحدي والتكتيك وعندك شجرة تطوير خاصه بكل كلاس تختاره والشجره هذي نفس باجي الالعاب تزيد الضربات الخاصه ب الاسلحه الثقيله او الشوتقن او تضيف على طاقتك الاساسيه والهلث مالك.
نظام رفع مستوى الصعوبه
من الاشياء الي اشوفها جديده هي طريقة رفع مستوى الصعوبه عندك ١٥ وورلد تير.. مع تقدمك بالقصه او المهمات الجانبيه قتل الاعداء وتغير اللبس الخاص الليك راح يرتفع مستوى الصعوبه هذا الشي جدا عجبني. وعلى شان التحدي يزيد كذلك اذا مت وانت تجمع نقاط الوورد تير راح تروح عليك. ومن الممكن كذلك ان ينزل المستوى اذا مت بشكل كثير. الورود تير كل ما صعدت بالمستوى راح يقدم لكم لووت واغراض افضل من ابيك و لجندري.
طريقة المهمات
البعض يعتقد بآن العبه عباره عن عالم مفتوح مثل لعبة ذا دفجن والاصح ان العبه مقاربه لتوجه دستني بآن انت تنتقل من خريطه الى اخرى تسوي المهمات الخاصه فيها. عندك المهمات الاساسيه الي تمشيك ب القصه وكذلك عندك المهمات الجانبيه مثل الهنت بآن ان تصيد وحش وتوديه حق صياد الوحوش ويعطيك بعدها جائزه او عندك الباونتي هنتر الي تروح تقتل شخص معين وبعدها تستلم الجائزه اتوقع وصلت طريقة المهمات الجانبيه. المهمات الجانبيه تعطي اضافه لتوسع في Lore العالم ولكن راح تحسها نفس الشي حتى المهمات الرئيسيه تنتقل من Checkpoint الى اخر تواجه فيه اعداء. وبالمناسبه من الاشياء الي اشوفها من النقاط السلبيه ب العبه اهيا اشكال الاعداء راح تشوفهم ان اهم متكررين وما يتغيرون لكن بنفس الوقت الي يميزهم واشوفه اكثر شي مضبوط اهوا الذكاء الصناعي الخاص فيهم العبه تبي منك تكون مندفع لان اذا ذبحت الاعداء بمسافه معينه راح تزيد طاقتك او اللهث ماللك. فاذا انت كنت منخش خلف غطاء معين الاعداء راح يسون فلانك عليك او يهاجمونك من الجنب وكذلك يحذفون عليك قنابل كل هذا في سبيل ان انت تتحرك او تتطلع من مكانك وهذا الشي كنت اشوفه تحدي صراحه.
الطور التعاوني
العبه تقدر تلعبها من اول القصه لي نهايتها بروحك ولكن المطورين اضافو العب المشترك انت مع اثنين من الاصدقاء وتقدرون تخلصون القصه مع بعض وكذلك المهمات الجانبيه. مشكلتي مع العبه ان اذا اقدر العبها بطور فردي ليش تخلي العبه تتطلب اتصال انترنت بشكل مستمر وهني مشكلة العبه ،سبب تآخر المراجعه اهيا السيرفرات لازم المطورين يكونون واعين بآن وسط الالعاب في ازدياد كل يوم ومع جائحة الكرونا الكل اغلب يومه مجابل الالعاب واجهة مشاكل كثيره ب الدخول على العبه في اول الايام وما زالت المشاكل تواجه بعض العبين.
ما بعد انتهاء القصه
بعد ما تخلص القصه والي خذت مني تقريبا ١٦ ساعه مع تغير مستوى الصعوبه في بعض الاماكن، بدا الاند قيم كونت والي اهوا الرحلات الاستكشافيه او الاكسبدشن وعددهم 14 مرحله هذي المراحل راح يكون فيها تحدي كبير بآن انت تخلصهم بالاضافه على اشياء وقيم مكنكس جديده.
الاصوات
بنسبه للاصوات راح اتكلم عن الموسيقى التصويريه ب العبه اصوات الشخصيات وكذلك اصوات البيئه … الموسيقى التصويريه بالعبه ما راح تكون متواجده بشكل كبير وشبه معدومه وممكن ماكو شي يميزها. ام اصوات الشخصيات ما راح تحس بآن في ارتباط ب المشهد وصوت الشخصيه وكآن الشخص بس قاعد يقرى من ورقه. ام الاصوات المحيطه اشوفها جيده وومكن افضل شي سواه قسم الصوتيات بالعبه.
التصوير والروسومات
ورسومات الشخصيات بالعبه اشوفها جدا عاديه الانميشن ومشاكل الب سنك. البيئه اشوف ان التنوع فيها جدا ممتاز الغابات الثلوج والاماكن الفضائيه جدا ممتازه. الاسلحه تحس ان اشكلها متكرر ولكن الي تشوفها عباره عن تغير سكنات السلاح نفسه.
السلبيات
قصه اقل من العاديه
الاونلاين ومشاكل الدخول بالعبه وكذلك المشاكل التقنيه الي تواجهك من كراسات ا، غيرها مع العلم بآن من الممكن نسخة الكونسول تكون افضل من ناحية الاستقرار
اصوات الشخصيات لا تعبر عن لعبه لجيل جديد وكان شخص بس يقرى النص مكتوب
التصوير اقل من العادي
الخلاصه والتقيم
القصه - 6
نظام العب - 9
الاصوات - 6
التصوير - 7
7
لعبة اوت رايدر قدمة لي لعبه اكثر من ١٥ ساعه وانا العبها قصتها ما شدتني ولكن اسرار وامكانيات اللور ممكن يكون شي مثير للاهتمام. لعبه تقدم الطور الفردي ولكن لازم تكون شابك اونلاين اشوفها من الافكار الي لازم تتغير بعالم الالعاب. طور تعاوني جميل ومتعه مع الاصدقاء. لعبه انصح انك تنتظر الحين وما تشتريها بوضع المشاكل الي فيها وومكن لو صار عليها خصم ٥٠٪ تاخذها. ام بنسبه لاصحاب القيم باس من الممكن انكم تنزلونها وتجربوها.
