30 دولار، استغلال أو سعر معقول ومستحق؟
طبعاً اقصد لعبة كانت خاتمة ممتازة لحصريات الجيل السابق، استمتعت فيها وبعالمها وطريقتها، واهي شبح تسوشيما، وبعد سنة تقريباً من صدورها، يقدم لما استوديو Suckerpunch نسخة الـ Directors Cut واللي تعتبر تحسينات للجيل الجديد بالإضافة لـ Expansion القصة.
وإذا تبون تعرفون اجابة السؤال اللي في بداية المراجعة، خلكم معاي لي نهاية هذا الفيديو اللي راح نتكلم فيها بكل شي يتعلق بالنسخة ورأيي وتقييمي وهل السعر هذا يسوى او لا؟
القصة:
في البداية، والشي اللي تميز فيه الاستوديو باللعبة اللي فاتت، اهي قصة جين ساكاي، صراعة الداخلي بين تقاليد وشرف الساموراي وبين اساليب الشبح، ومن الاشياء اللي حببتني في القصة ايضاً اهي تطور شخصية جين وايضاً الشخصيات الثانوية وعلاقتك فيهم وقصصهم.
والحين في إضافة جزيرة ايكي، تكمل بعد احداث الجزء اللي فات، والخطر القادم من عشيرة الساحرة The Eagle او النسر لجزيرة تسوشيما، فـ المطلوب منك إنك تبحر الى جزيرة ايكي الخالية من القانون واللي لها ماضي مظلم مع عشيرة ساكاي، وتحاول تكون علاقات مع سكانها وتوقف النسر من نشر الرعب واحتلال الجزيرة والتقدم لـ تسوشيما.
القصة أقدر اقسمها لي 3 اقسام:
- محاربة النسر او The Eagle
- نظرة سكان جزيرة ايكي للساموراي جين ساكاي
- ماضي جين وعشيرته
راح تمر في جميع هذه الامور في مسيرتك لإنهاء اللعبة، الأستوديو أضاف الطابع الشخصي إللي متعلق في شخصية جين مثل ما سوا في الجزء السابق وحببني فيها، لكن ايضاً في نفس الوقت، اشوف ان ثغرات بسيطة كان ودي اعرف عنها أكثر والاسباب اللي ادت لهذي الاحداث، ايضاً في تسوشيما كان في قصص جانبيه لكل شخصية تكمل معاها أكثر من مهمة، افتقد هذا الشيء في إضافة ايكي وكنت اتمنى اشوف على الاقل شخصية ثانوية لها عدة مهام مثل قبل.
والحين خلونا نتكلم عن تغييرات نسخة المخرج وعالم جزيرة ايكي.
بتكلم عن أكثر اشياء عجبتني في البداية، واهي استغلال خواص يد تحكم البلايستيشن 5 مثل Haptic Feedback – Adaptive Triggers.
الاهتزازات كانت مثالية وممتازة في القتال وراح تحس في الضربات وحتى خطوات الحصان إذا كانت على الصخر او الرمل وايضاً Adaptive Triggers والمقاومة لما تحاول تستخدم ال hook او الرمح، كان استغلال مناسب لخواص الـ Dualesense ومن الإضافات ايضاً اهي الأصوات ثلاثية الابعاد استخدمت سماعات بلايستيشن 3D Pulse وكان الاداء جداً ممتاز وتوزيع الأصوات حواليك وتحديداً خلال مقاتله المغول وتغيرات الجو مثل المطر.
تقدر تستخدم الحصان في ضرب الأعداء يعني على سبيل مثال الحصان راح يسوي charge وتصدم الأعداء اللي جدامك بس بالنهاية راح يأخذ من Resolve اللي عندك و لكن حركة حلوة انك تستفيد من الحصان في القتال، القتال مع الأعداء أصبح في تحدي بشكل اكبر و السبب ان بين كل مجموعة تلاقي شامان او سحر يلقي تعويذة وتخلي المجموعة اقوى ويعطيهم مثل الشيلد فلازم تذبح الساحر اول بعدين تذبح باقي المجموعة وهذا بوجهة نظري اشوفها تحدي جميل و طبعًا الأعداء صاروا أذكى من قبل، ويستخدمون اكثر من ستانس ويبدلون بينهم، فـ لازم تركز على كل ستانس وانت بالمقابلة تستخدم الستانس المناسب علشان تهزمهم.
اما عن استغلال خواص الـ SDD فهو ممتاز جدا وloading شبه معدوم في اللعبة والتنقل Fast travel ماكنت تحس فيه، مجرد تضغط على المكان وتلقى نفسك هناك في عدة ثواني.
في بعض الحيوانات الأليفة اعزكم الله الجديدة ومن خلال ترويضها راح تحصل على تعويذات تفيدك في اللعبة، وايضاً مسابقات قتال ومسابقات تحدي الاسهم اللي منتشرة في الخريطة وشخصياً استمتع فيها. تم تحسين حركة الشفاه باللغة اليابانية وأصبحت أفضل لكن فقط خاصية تحريك الشفاه مع اللغة اليابانية متوفرة للبلايستيشن 5. تمت إضافة lock على الشخص اللي تقاتله بشكل اختياري تقدر تفعلها في القائمة، وايضاً إضافة عدة طرق للتحكم وتقدر تختار ما بين 4K وسرعة اطارات أفضل.
الحين خلونا نتكلم عن مدة اللعبة واهو العنصر الاهم:
انا شخصياً لما العب العاب العالم المفتوح اخذ راحتي في الاستكشاف، فـ لو نتكلم عن القصة اخذت مني من 7 الى 8 ساعات، واستكشاف الخريطة والتحديات وباقي الامور الثانوية اخذت مني تقريباً وقت أكثر من القصة نفسها وختمتها بشكل كامل مع كل التحديات والاستكشاف في 25 ساعة.
واتوقع اللاعب العادي اللي ما يهتم لهذه الامور راح يستغرب من 16 الى 18 ساعة.
التقييم النهائي
القصة - 8.5
التغييرات وعالم إيكي - 9
مدة اللعب - 8.5
السعر - 6
8
أعطتني اللعبة 25 ساعة لإنهاء واستكشاف جزيرة IKi بشكل كامل، لكن متوسط الوقت لإنهائها هو 15 ساعة تقريباً، عالم جميل وممتع مثل ما كان في اللعبة الأساسية، القصة تعمقت في ماضي جين واخذت جانب عاطفي مميز ويخليك تتعلق في الشخصية مثل ما صار في اللعبة الأصلية. ولكن الإضافة ما كان فيها التنوع في القصص الجانبية والتعمق في الشخصيات اللي تقابلها في مهمتك، من وجهة نظري إضافة ممتازة لو كان سعرها 20 دولار مثل باقي الإضافات الثانية اللي نعرفها، اما بخصوص تحسينات الجيل الجديد، التحسينات كانت ممتازة ومميزة جداً لكن من وجهة نظري انه شي غير جيد إني أدفع مبلغ زيادة لأتمكن من الاستمتاع في الجهاز الجديد.
